Num 8 | NdeIBE | STEP | UJehova wathi kuMosi,

Numbers 8

Ukumiswa kwezibane

1 UJehova wathi kuMosi, 2 “Tshono ku-Aroni uthi, ‘Nxa usumisa izibane eziyisikhombisa, zifanele zikhanyise indawo ephambi koluthi lwezibane.’ ”

3 U-Aroni wenza njalo; wamisa izibane oluthini zikhangele phambili, njengokulaywa kukaMosi nguJehova. 4 Uluthi lwesibane lwalwenziwe ngale indlela: Lwalwenziwe ngegolide elicanduliweyo – kusukela esidindini salo kusiya embaxeni zamaluba alo. Uluthi lwesibane lwenziwa lwafana xathu lalokho uJehova ayekutshengise uMosi.

Ukwahlukaniswa kwabaLevi

5 UJehova wathi kuMosi: 6 “Yahlukanisa abaLevi kwabanye bonke abako-Israyeli ubahlambulule ngokomlayo. 7 Nanku ozakwenza nxa usubahlambulula: Bachele ngamanzi okuhlambulula, uthi kabaphuce imizimba yabo yonke njalo bagezise izigqoko zabo, bazihlambulule. 8 Kabathathe inkunzi eliguqa ndawonye lomnikelo wayo wamabele ayifulawa ecolekileyo exutshaniswe lamafutha; ube usuthatha inkunzi yesibili ibe ngumnikelo wesono. 9 Letha abaLevi phambi kweThente lokuHlanganela ube usubuthanisa isizwe sonke sako-Israyeli. 10 Letha abaLevi phambi kukaJehova, abako-Israyeli babeke izandla zabo phezu kwabaLevi. 11 U-Aroni kethule abaLevi phambi kukaJehova njengomnikelo wabako-Israyeli wokuzunguzwa, ukuze balungele ukwenza umsebenzi kaJehova.

12 “Nxa abaLevi sebebeke izandla zabo phezu kwamakhanda ezinkunzi, uzakwenza umnikelo wesono kuJehova ngenye yazo, ukwenzela abaLevi indlela yokubuyisana.

13 Misa abaLevi phambi kuka-Aroni kanye lamadodana akhe ubethule njengomnikelo wokuzunguzwa phambi kukaJehova.

14 Ngalokhu uzakube usuwahlukanise abaLevi kwabanye bonke abako-Israyeli, ngakho abaLevi bazakuba ngabami.

15 “Ngemva kokuba usuhlambulule wethula abaLevi njengomnikelo wokuzunguzwa, kabeze benze umsebenzi wabo eThenteni lokuHlanganela. 16 Bangabako-Israyeli abaphiwe mina ngokugcweleyo. Sengibathethe baba ngabami esikhundleni samazibulo, wonke umntwana ongumfana wokuqala ozelwe ngowesifazana wako-Israyeli. 17 Wonke amazibulo ako-Israyeli, awabantu kumbe awezinyamazana, angawami. Ngazehlukanisela wona mhla ngibulala amazibulo wonke eGibhithe. 18 Ngakho-ke sengithethe abaLevi esikhundleni samazibulo wonke angabafana bako-Israyeli. 19 Kubo bonke abako-Israyeli, senginike abaLevi ku-Aroni kanye lamadodana akhe ukuba babe yizipho ukuze benzele abako-Israyeli umsebenzi kanye lendlela yokubuyisana eThenteni lokuHlanganela ukuze abako-Israyeli bangahlaselwa yisifo nxa besondela endlini engcwele.”

20 UMosi lo-Aroni kanye labo bonke abako-Israyeli benza njalo kubaLevi njengalokhu uJehova walaya uMosi. 21 AbaLevi bazihlambulula njalo bagezisa izigqoko zabo. Ngakho u-Aroni wabethula phambi kukaJehova njengomnikelo wokuzunguzwa njalo wabenzela indlela yokubuyisana ebahlambulula. 22 Ngemva kwalokho, abaLevi beza eThenteni lokuHlanganela ukuzakwenza umsebenzi wabo ngaphansi kuka-Aroni kanye lamadodana akhe. Benza njalo kubaLevi njengokulaywa kukaMosi nguJehova.

23 UJehova wathi kuMosi, 24 “Lokhu kuqondane labaLevi: Abesilisa abaleminyaka esukela kwengamatshumi amabili lanhlanu kusiya phezulu bazakwenza umsebenzi eThenteni lokuHlanganela, 25 kodwa asebeleminyaka engamatshumi amahlanu okuzalwa, bazamiswa ukuphatha imisebenzi yabo yensuku ngensuku bangabe besasebenza futhi. 26 Bangasiza nje abafowabo nxa besenza imisebenzi yabo eThenteni lokuHlanganela, kodwa bona ngokwabo bangasebenzi. Le yiyoke indlela ozakupha ngayo abaLevi imisebenzi.”